الله يجازيك يا عم عبدالناصر

من طرف سوسو الأحد فبراير 21, 2010 11:36 pm

اليكم اعزائى القراء هذة القصيدة التى اعجبتنى جدا
لشاعرنا الصعيدى الجميل
عبد الرحمن الابنودى
فاْرجو ان تنال اعجابكم كما نالت اعجابى
وانتظر منكم التعليق عليه

عبدالرحمن الابنودى

الله يجازيك يا عم عبدالناصر

الليل مليّل
والألم عاصر
لسه اللي بيبيع أمته كسبان
وكل يوم
أطلع أنا الخاسر

أما انت خميت مصر دي خمة
يوم ما ناديت بالعشق للأمة
ورطتنا نعشق خريطة عبيطة
وبشر ما نعرفهاش
وبلاد.. ما بنزورهاش
إلا.. فواعلية وبنايين وسواقين
وخدامين.. وطباخين.. وكناسين
بلاد أسافرها سعيد
ارجع حزين
حبيتها زي ما قلت لي.. واكتر
ع الأجنبي ما استكترتش عليا تستكتر
ع الأجنبي ما اتنقورتْش عليا تتنقور.
تطمع في دمعي
وف تعاسة راتبي.
مُلهم أنا.. واعمل غبي
وادي الألم يا عم عبدالناصر
زاحف وبيحاصر
وآدي الجميع خاسر
وآدي فجر أمتنا الجميل مغلوب
وآدي انتحار الأمة بالمقلوب
وأنا... غريب الدار..
لابسني توب العار
ساكن في وطني بالإيجار

قاعد أنا ع الجسر في القيَّالة
من قلب اللهيب مِنشالة
وقلبي.. ساقية حزن سَيالة
باغني..
ما اعرف مغني والاّ عديد
زي افتكار الميتين.. في العيد.
باعاني وحداني
شياطيني لابساني
والأمة قدامي.. مفارقاني
يا رب...
ما تحببني في الناس الملاح تاني
يا رب
ما ترجعني أعشق
ضحكة اخواني
يا رب
كرهني في أوطاني

ما أخيبك أمَّة
ما أتعسك أمة
لا عقل... ولا همة...
لا مصدقه فعلك
ولا تحفظي كلمة.
أمة.. تدور وتلف..
تقيلة.. مش حتخف
حماسية... وحماسها
بكتيرُه ساعة.. يجف.
أمة بتتخابِط
أمة بتتعابط
أمة ومالهاش
لا زابط ولا رابط
ولا كبير عيلة
ولا قرابةْ دم
وفكرة وهمية
ما تورث إلاّ الهمّ...
ما تحل عني يا عم..
إحنا ورثنا كلام
إحنا تاريخنا كلام
علشان كده لما تقول..
علي طول أقول:
وبكام؟؟
ما هو حب؟؟ دبرني
وتاريخ؟.. فكرني
وطريق؟.. نورني
ومصير؟.. بصرني
ده انا بقيت عربي
من قبل ما القي
اللي يمصرني.
أنا انتمائي لأمتي...
ممسخرني.
محسوبة في الأحزان عليّ
في الفرح تنكرني
ياللي انتي لا أمة
ولا انتي أم..
فيه أم
ما تعرفش ساعة الألم..
تضم؟